Сүхбаатар сум нийт 4535 га газартай ба хойд талаараа Баянхан уул, өмнө талаараа Орхон гол, зүүн талаараа Буур хээрийн тал, Тужийн нарс, баруун талаараа Сэлэнгэ их мөрөн, Сайхны хөтөл зэрэг түүхт газраар хиллэдэг, байгалийн үзэсгэлэнт нутаг, Монголын тусгаар тогтнолын түүхт нутаг.

Сүхбаатар хот Баруун Европыг холбосон төмөр замын боомт хот, умард хилийн харуул хот учир эдийн засаг, хөгжлийн ирээдүй бүхий түшиц газрын нэг юм.

Сүхбаатар сум нь 2016 оны жилийн эцсийн байдлаар 5811 өрх,  22482 хүн амтай,  19367 толгой малтай, засаг захиргааны 8-н багтай ба Улсын тэргүүний 12 жилийн 1,2,4-р сургууль, 12 жилийн 3,5,6-р сургууль, Албан бус боловсролын 1 сургууль, Спортын  сургууль 1, Эрдмийн чуулган хувийн дунд сургууль 1, Мэргэжил сургалт үйлдвэрлэлийн төв 1, Улсын тэргүүний 3,4-р цэцэрлэг болон 1,2,7-р цэцэрлэгүүд тус тус боловсрол хүмүүжлийн үйл ажиллагаа явуулдаг.

Сэлэнгэ аймгийн төв Сүхбаатар хотод аймгийн Нэгдсэн эмнэлэг, 15 хувийн хэвшлийн эмнэлэг, мөн 4 өрхийн эмнэлэг тус сумын иргэдэд эрүүл мэндийн үйлчилгээг хүргэн ажиллаж байна.

Тус суманд 815 аж ахуйн нэгж үйл ажиллагаа явуулдаг бөгөөд хоногт 200 тонн гурил үйлдвэрлэх хүчин чадал бүхий Алтантариа ХХК Сүхбаатар сумын 200 гаруй иргэнийг ажлын байраар хангаж, тогтвортой үйл ажиллагаагаа явуулж ирсэн.

Мөн Хаан, Хас, Хадгаламж, Голомт, Капитал, Төрийн банк зэрэг банк санхүүгийн байгууллагууд иргэдэд үйлчилгээ үзүүлдгээс гадна үүрэн телефоны Мобиком, Скайтел, Юнител, Жи Мобайлын салбарууд харилцаа холбооны үйлчилгээ үзүүлснээр гар утас, интернет хэрэглэгчдийн тоо жилээс жилд  өсөн нэмэгдэж байгаа нь Сүхбаатарчууд бид орчин үеийн техник технологийн дэвшилтэй хөл нийлүүлэн алхаж буйн илрэл юм. 

Манай сум нь Хөдөлмөрийн баатар М.Чойжил, ахмад дайчин Ж.Дашхүү, Ж.Жанчив, Ж.Дагва, Гавъяат хуульч Б.Эрдэнэсамбуу, Ойн гавъяат ажилтан Б.Жамсран, УГЖ Ч.Нарантуяа, УГЗ М.Бямбасүрэн,  Гавъяат багш  Д.Дуламсүрэн, Л.Дорждамба, З.Мааньжав, УГЖ Д.Цогтгэрэл, Хүний гавъяат эмч Д.Чойжилсүрэн зэрэг олон алдар цуутнуудын өлгий нутаг билээ.

Сүхбаатар сумын хөгжлийн давуу тал

Европ Азийг холбосон босоо тэнхлэгийн авто болон төмөр зам дайран өнгөрдөг Монгол  улсын хилийн боомт хот Хувьсгалын өлгий нутаг, Орхон Сэлэнгийн үзэсгэлэнт нутагт оршдог тул аялал жуулчлал, усан замын тээвэр хөгжүүлэх боломжтой.

Цаг агаарын тааламжтай нөхцөлтэй хил орчмын худалдаа, аж үйлдвэрлэл хөгжүүлэх өргөн боломжтой учир үйлдвэрлэл, эдийн засгийн тогтвортой хөгжлийн ирээдүйтэй.

Зам харилцаа, эрчим хүч зэрэг дэд бүтэц сайтай. Ижил төстэй муж, хотуудтай шууд болон уламжлалт харилцаатай. Монгол улсын тусгаар тогтнолын түүхийн хоймор нутагт оршдог тул судалгааны арвин өв хуримтлагдсанаараа онцлог.